சித்த மார்கத்தில் கிடைத்த சித்தர்களின் அறிவுரைகள், மனித வாழ்க்கைக்கு வழிகாட்டும் அரிய சிந்தனைகளாகும். தர்மத்தின் மகத்துவத்தையும், அதன் ஆன்மிகப் பயன்களையும் எடுத்துரைக்கும் சில அறிவுரைகள் இங்கே தொகுக்கப்பட்டுள்ளன.
ஞான முத்துக்கள்
- விதி விலகி வழிவிட திடமாக தர்ம பாதையில் நடந்து கொண்டே இரு.
- தர்மத்தின் வழி செல்லச் செல்ல, கர்மத்தின் வலி குறையும்.
- தர்மத்தைப் பிடி, அது உன்னை கரையேற்றும்!
- தர்ம சிந்தனை வந்திட பூர்வ புண்ணியம் வேண்டும்.
- தர்ம சிந்தனை பிறப்பிலே வர, அவன் முன்னோர்கள் புண்ணியம் செய்திருக்க வேண்டும்.
- சத்தியத்தையும் தர்மத்தையும் எவன் ஒருவன் விடாப்பிடியாகப் பிடித்துக் கொள்கிறானோ, அவனைத் தேடி இறை வரும்.
- சுவாசிப்பதுபோல், அன்னம் உண்பதுபோல், செயல்படுவது போல், தர்மம் இயல்பாக இருக்க வேண்டும்.
- மனிதன் நல்லதை எண்ணி, நல்லதை உரைத்து, நல்லதைச் செய்யும்பொழுது உண்மையான தெய்வீக ஞானம் பிறக்கும்.
- செய்கின்ற தர்மங்கள் எல்லாம் மேலும் இறைவனருளைக் கூட்டி வைக்கும், முன்ஜென்ம பாவத்தைக் கழித்து வைக்கும், புண்ணியத்தைப் பெருக்கி வைக்கும், தேவையற்றதை எல்லாம் அது வகுத்து வைக்கும்.
- மனம் உவந்து, மனமார, மனம் ஆறுதல் பெற செய்யும் காரியத்தில் தான் புண்ணியம் வரும்.
- ஒரு மனிதன் என்ன பிரார்த்தனை செய்தாலும், எத்தனை மந்திரங்கள் உரு ஏற்றினாலும், எத்தனை அபிஷேகங்கள், யாகங்கள் செய்தாலும் கூட, அவனிடம் உதவும் குணம் இல்லை என்றால், இறை அருளைப் பெற முடியாது.
- இறை நம்பிக்கை இல்லாமல் இருந்தாலும், உதவும் குணமும், தர்மமும் ஒரு மனிதனிடம் இருந்தால், அவன் இறையைத் தேட வேண்டியதில்லை, இறையே அவனைத் தேடி வரும்.
ஓம் ஸ்ரீ லோபாமுத்திரா சமேத அகத்தியர் திருவடிகளில் சமர்ப்பணம்!